வடுக்கள் சாவதில்லை..

கீறலாகவோ
கன்றலாகவோ
பிளவாகவோ
பொசுங்கியதாகவோ
பொங்கியதாகவோ
எவ்விதமாகவுமிருக்கலாமவை

மணிக்கட்டில்
கால்விரலிடுக்கில்
தாடை நுனியில்
கண்ணோரத்தில்
முதுகுப்புறத்தில்
எங்கானாலுமிருக்கலாமவை

அதிகார விறைப்பால் 
ஆதங்கத்தால்
இயலாமையால்
வெஞ்சினத்தால்
பொறாமைத்தீயால்
எதுக்கானாலுமிருக்கலாமவை

எல்லாக் காயங்களும்
உதிரம் உகுப்பதில்லையெனினும்
வடுக்களின் ஞாபகங்கள்
இறப்பதேயில்லை...
______________________

ஒய்யாரப் பின்னல்...

மூலை மழுங்கிப் 

பழுப்பேறிய புத்தக இடுக்குகளில்

குஞ்சு பொரித்துக் கொண்டிருந்தன

மயிலிறகுகள்

வெள்ளியன்று 

வெளிவந்த முட்டைக்குள்

வைரமாகிக் கொண்டிருந்தன 

பொன் கருக்கள்

உயிர்த்த ஞாயிறில்

மரித்த பறவைக் கோதில்

வானவில்லின் வர்ண ஜாலம்

என்னைப் பார்த்துக் கண் சிமிட்டியது

வர்ணப் பூச்சை - விட

சுண்ணாம்பின் 

வெண்ணிறமே விருப்பாயிருந்தது..  

ஆட்காட்டி விரலில் 

அமிலம் தொட்டுத் 

தடவ ஆரம்பித்தேன்

சிறு கிள்ளையொன்று

எட்டி நின்று முடியென்று 

எதையோ பிடித்திழுத்து  

வித்தை காட்டியது 

கையிலிருந்ததை நழுவ விட்டு

குட்டையில் கை நனைத்துதறித்

திரும்பிப் பார்த்தேன்

சிறுமியொருத்தி 

கற்றையாக எதையோ 

பின்னிக் கொண்டிருந்தாள்

ஊர்ந்து கொண்டிருந்த 

பேன்கள் எதையோ உறுதி செய்தன

பார்த்துக் கொண்டிருக்கும்போதே 

பேன் முட்டைகள் பெருகலாயின 

வைரக் கனவுகளுடனான 

கருவை விட 

முட்டையில் வளரும் 

முடிக்குத்தான் எத்தனை

வீரியம்...!

_______________________________