துளிக் குறிப்பு...

கைகூடும் தருணம் விதியின் பால் இருந்த போதிலும்

மரணத்தின் வாயிலைத் தட்டிப் பார்க்க முடியும்

தெரிந்தும் கூட அதைச் செய்வதில்லை 

தடுத்து நிற்கும் உணர்வுக்கு 

பயம் என்று காரணப்பெயர் சூட்டியாகிறது

உண்மையில் அந்த உணர்வின் பெயருமே தெரிவதில்லை

பரவசமான ஒரு உணர்வு

மின்சாரம் பாய்வது போன்றிருக்கலாம்

ஸ்தம்பித்திருப்பதில் பேதலித்து 

உணர்வே அற்றது போலாகி விடுகிறது

மீட்டெடுப்பு முயற்சியாக 

அதனருகில் செல்லாது 

உடனிருக்கும் மரணத்தைப் போல

அதைச் சுற்றிக் கொண்டே செல்ல வேண்டியிருக்கிறது

ஒரு வார்த்தையின் விளிம்பில்

வந்து விழும் ஒரு எழுத்தை மட்டும்

தொட்டுப் பார்க்கவும் அஞ்சி

அதைச் சுற்றிச் சுற்றிப் பயணிப்பது போல் 

அழகான அந்த நொடிகளை எங்கோ

ஆழமாகப் புதைத்து வைத்து

அறையின் சிலை முன்
மலர்க் கோலம் வரைவது போல் 

விரிவது விடுத்துக் கூம்பும் இந்த
மனமொட்டில் பட்டுத் தெறிக்கும்
இது ஒரு துளி மரணம்..