மழையில்லாக் கார்த்திகை
இத்தனை வருடங்களில்
இந்தத் தடவைதானாம்
உயிரை வாங்குவதாகக் கரித்துக் கொட்டியவர்கள்
உச்சுக் கொட்டியபடி சென்றார்கள்
கனவிலிருந்து விழிப்பது போல் விழித்தேன் - ஆமாம்
கை பிடித்து வந்து கொண்டிருந்த மழை
நின்று விட்டதைக் கூட உணராது
நடந்து கொண்டே இருந்திருக்கிறேன்
அதனதன் நிமித்தம் எதுவெதுவோ
நடந்தபடிதான் இருக்கின்றன
மழையில்லாது நான் நின்றுவிடவில்லை
நானில்லாதும் மழை எங்கோ பெய்து கொண்டுதானிருக்கும்
நீர்வீழ்ச்சியில் விழுவது கூடத் தெரியாது விழும் தூவானமும்
புவியீர்ப்பு உணராத என்னிரு பாதங்களும் - இன்னும்
வெறுமனே நடந்து கொண்டிருக்கும் பிற பலவும் போல
இந்த மழையும் மருகி மருகி
எங்கெங்கோ கரைந்து கொண்டிருக்கிறது
என் நாசியுணர்த்தும் வாசனையில்
காற்றின் கைகளில் கொடுத்தனுப்பப்பட்ட
வாசிக்கப்படாத மடலொன்று படபடக்கிறது
பிரித்துப் பார்க்க அவசியமெதுவுமில்லை
தெரிந்த செய்திதான் இது
மடங்கியிருக்கும் குடையை மறக்காது
மறந்து விட்டுச் செல்ல வேண்டும்
மற்றதை நேரில் பேசிக் கொள்ளலாம்
