சுப்பு vs. லக்ஷ்மி...

சுப்புவும், லக்ஷுவும் சரியான ஜோடிங்க..! இரண்டு பேரும் அதிர்ந்து பேச மாட்டாங்க. சுப்பு வாழைப்பழத்தில ஊசி ஏத்துறாப்ல பேசுற ஆளு. கோபமா இருக்கிறப்போ செய்யுற வேலையும் சரி, பேசுற பேச்சும் சரி மிக மிக மிக நிதானமா இருக்கும். அவ்ளோ அழுத்தம்.

லக்ஷு சுப்புவ திட்டுறது அந்தம்மாவுக்கே கேக்காது. ச்சே ச்சே பயம் கியம் எல்லாம் கிடையாதுங்க. சமையல்கட்டில மட்டும் பாத்திரம் கொஞ்சம் அதிரும்.. அவ்ளோதான். இதுங்க ஆடுற கண்ணா மூச்சி இருக்கே, சொல்லி மாளாதுங்க.

மாடுலார் கிச்சன் லெவலுக்கு.. நின்னுக்கிட்டே சமைக்கிறதுக்கு அளவுக்கு மிஞ்சின லவ்வோட லக்ஷுக்கு சுப்பு வசதியா அமைத்துக் கொடுத்த சமையலறை. இரவுச் சாப்பாடு முடிச்சு சுப்பு கட்டைய நீட்டி கொறட்டை விடுற சமயத்தில, லக்ஷு அடுப்புக்கு பின் பக்கமா மேல, சாதமும், தேங்காயும் கலந்து எலிக் கூட்டத்துக்கு சாப்பாடு வச்சிட்டு படுப்பாங்க.

லக்ஷு படுத்துறங்கியதும் சுப்பு எழுந்திரிச்சு எலிப்பொறில பாஷாணம் வச்சு அடுப்புக்கு கீழ லக்ஷு கண்ணில படாம வச்சுட்டு தூங்க போவாருங்க. பொறி வைக்கிற நாள்ல எல்லாம், வழக்கமா எழுந்திருக்கிற நாலு மணிக்கு அரை மணி நேரம் முன்னாடியே எழுந்திரிச்சு, லக்ஷு விழிக்கறதுக்கு முன்னாடியே, பொறில மாட்டி உசிர விட்ட எலிக்கு இறுதிக்கிரியை முடிச்சு அடக்கம் பண்ணிடுவாருங்க.

ஒரு வேளை தப்பித் தவறி லக்ஷு கண்ணில இது பட்டிச்சோ நாள் ஃபுல்லா உண்ணாவிரதம், வாய்க்குள்ள திட்டு, பாத்திர உருட்டுன்னு ஒரு வழி பண்ணிடுவாங்க. சுப்பு ஒண்ணும் தெரியாத அப்பாவி மாதிரி ரொம்ப நிதானமா வேலைய பார்த்துட்டிருப்பாருங்க.

சுப்பு ஒண்ணும் லேசுப்பட்ட ஆள் இல்லைங்க. பூஜா ரூம்னு கூட பார்க்காமலே, மாஸ் மர்டர் பண்ண ப்ளான் பண்ற ஆளுங்க. நல்லெண்ணெய் பாட்டில் எடுத்து ஒரு இத்துனூண்டு எண்ணெய விட்டு, பாட்டில தொறந்து பூஜா ரூம்ல எங்கயோ ஒரு மூலைல வச்சிடுவாரு. இதுக்கு அங்க இருக்கிற சிவபெருமான் குடும்பமும்.. இன்ன பிற கடவுள்களும் சாட்சி.. லக்ஷ்மி உட்பட.

பாவம் கரப்பான் பூச்சிக் கூட்டம், இந்தாளோட சூது தெரியுமா வாது தெரியுமா. கூட்டம் கூட்டமா உள்ள போய் மசங்கிக் கிடப்பாங்க. சுப்பு நிதானமா எடுத்துக்கிட்டு போயீ தோட்டத்தில குழி வெட்டி அத்தனை கரப்பான் பூச்சிக்கும் உசிரோட ஒரே சமாதியா கட்டிடுவாருங்க. ஆள் மிச்சம் புடிக்கிறதிலயும் கில்லாடிங்க.

அந்தாளு கரப்பான் பூச்சிங்களுக்கு சமாதி கட்டறப்போ லக்ஷு பின்னாடி கைய கோர்த்துக்கிட்டு, முணுமுணுன்னு இல்லாத சாபம் எல்லாம் போட்டு சுப்புவ திட்டிக்கிட்டு அங்கிட்டும் இங்கிட்டும் நடந்துக்கிட்டிருக்குமுங்க. அன்னைக்கும் கண்டிப்பா உண்ணாவிரதம் கடைப்பிடிக்கப்படும்.

யாரு இந்த சுப்புலக்ஷ்மி ஜோடின்னு பார்க்கறீங்களா.. என்னோட தாத்தா அண்ட் பாட்டி தானுங்க.. இவங்கள பத்தி ஒரே இடுகைல சொல்ல முடியும்னு நினைக்கறீங்க?.. நோ வே.. வெயிட் ப்ளீஸ்..

சுப்புலக்ஷ்மி

_____/\_____